Мы — вольныя людзі!

Мінулы тыдзень для Магілёўшчыны быў асабліва багаты на велічныя падзеі. У суботу і нядзелю нашы любыя Магілёў і Бабруйск адсвяткавалі свой дзень нараджэння. Вобласць на працягу тыдня ветліва прымала гасцей некалькіх мерапрыемстваў міжнароднага ўзроўню: фестывалю духоўнай музыкі “Магутны Божа”, інвестфоруму “Млын поспеху” і фестывалю народнай творчасці “Вянок дружбы”.
І ўсе ж галоўная і самая хвалюючая падзея адбылася 3 ліпеня. Прыдняпроўскі край ярка, шырока і велічна адзначыў Дзень Незалежнасці нашай Айчыны.
Аналагічныя ўрачыстасці адбыліся ва ўсіх раёнах Магілёўшчыны.

У абласным цэнтры з гэтай нагоды на мемарыяльным комплексе “Буйніцкае поле” адбыўся мітынг, прысвечаны гэтай знамянальнай даце. Напачатку яго удзельнікі — прадстаўнікі ўлады, працоўныя калектывы, ветэраны і моладзь — усклалі кветкі да капліцы і ўшанавалі хвілінай маўчання тых, хто загінуў у баях. У іх гонар прагучаў салют.
Ад імя абласнога выканаўчага камітэта і абласнога Савета дэпутатаў з вялікім святам павіншаваў усіх прысутных кіраўнік вобласці Уладзімір Даманеўскі. У сваім звароце Уладзімір Віктаравіч адзначыў, што Дзень Незалежнасці з’яўляецца сімвалам яднання ўсіх грамадзян Беларусі. У жыцці кожнага народа ёсць лёсавызначальныя дні і падзеі, якія становяцца кропкай адліку новага этапа ў яго гісторыі, выклікаюць найвышэйшы духоўны ўздым і яднанне ўсіх грамадзян. Для нас важнай вехай стала вызваленне ад нямецка-фашысцкіх захопнікаў у самай крывавай вайне 20-га стагоддзя. Воляй нашага народа, выказанай на Рэферэндуме, гэты дзень мы адзначаем як галоўнае дзяржаўнае свята — Дзень Незалежнасці Рэспублікі Беларусь. За мінулыя дзесяцігоддзі пасля вызвалення Беларусі ад фашызму краіна памножыла эканамічны і духоўны патэнцыял, здабыла суверэнітэт, ператварылася ў сучасную еўрапейскую дзяржаву, з меркаваннем якой лічацца ў свеце. «Сёння, у новых эканамічных умовах, наша дзяржава даказвае сваю здольнасць забяспечыць стабільнасць развіцця, а беларускі народ паказвае найлепшыя рысы нацыянальнага характару — уменне ў любых умовах з’яднацца, выстаяць і перамагчы», — заявіў старшыня аблвыканкама. Ён звярнуў увагу на тое, што на мерапрыемстве шмат моладзі. «Гэта значыць, што вы неабыякавыя да подзвігу сваіх дзядоў і прадзедаў. І гэта вельмі важна. Бо менавіта вам, юнакі і дзяўчаты, трэба будзе захаваць і памножыць спадчыну продкаў. Упэўнены, у вас наперадзе будзе шмат подзвігаў. Працоўных, спартыўных, сямейных. Але самае галоўнае — цяперашняму пакаленню неабходна стварыць новую моцную эканоміку, як гарант незалежнасці нашай краіны сёння і ў наступныя гады. А памяць пра гераічнае мінулае будзе служыць вам крыніцай невычэрпнай энэргіі, накіраванай на развіццё і росквіт роднай Беларусі», — лічыць Уладзімір Даманеўскі.
Кіраўнік вобласці ад усяго сэрца павіншаваў усіх з Днём Незалежнасці, пажадаўшы шчасця, міру, згоды і дабрабыту. Затым ва ўмовах ўрачыстасці уручыў пасведчанні аб занясенні ў Кнігу славы Магілёўшчыны шэрагу жыхароў вобласці, якія дасягнулі высокіх вынікаў у працы. У іх ліку — кіраўнік бабруйскага аддзялення Беларускага саюза мастакоў Валерый Калтыгін і першы Народны настаўнік Беларусі Валерый Барашкаў, аператар машыннага даення КСУП “Круглянскі-Агра” Жанна Пудзікава.
Пасля мітынгу кіраўніцтва вобласці і горада прадстаўнікі працоўных калектываў, грамадскасці і моладзі па традыцыі ўсклалі кветкі да памятнага знака вядомаму пісьменніку Канстанціну Симанаву.
Затым святочныя мерапрыемствы, прымеркаваныя да знамянальнай даты, перамясціліся ў цэнтр Магілёва. На шматлікіх пляцоўках былі арганізаваны святочныя канцэрты творчых калектываў горада. На вуліцы Ленінскай адбылося свята нацыянальнай культуры “Мая радзіма — Беларусь”. На Плошчы Зорак прайшла урачыстая цырымонія ўзнагароджвання пераможцаў і фіналістаў гарадскога творчага конкурсу на лепшую песню пра Магілёў, прысвечанага 750-годдзю абласнога цэнтра.
Песня «З нараджэннем, Магiлёў!» паэта-песенніка Аляксандра Шлеянкова і кампазітара Мікалая Яцкова стала пераможцам конкурсу.
Урачыстасць ўпрыгожылі выступленне Заслужанага калектыву Рэспублікі Беларусь — аркестра народных інструментаў імя Народнага артыста Беларусі Леаніда Іванова Магілёўскай абласной філармоніі» святочны канцэрт, якія адбыліся на Плошчы Славы.
Увечары сотні магілёўцаў і гасцей горада далучыліся да агульнарэспубліканскай акцыі «Праспяваем гімн разам!» Галоўнае свята краіны завяршылася святочным салютам на ўзбярэжжы Дняпра.
***
Яшчэ адно маштабнае мерапрыемства прайшло ў Магілёве ў мінулыя выхадныя. Напярэдадні Дня Незалежнасці Рэспублікі Беларусь сівы і вечна юны горад на Дняпры адсвяткаваў свой 750-гадовы дзень нараджэння.
З нагоды юбілея Прэзідэнт Беларусі Аляксандр Лукашэнка накіраваў віншаванне магілёўцам.
«Доўгая і няпростая гісторыя ў горада. За гэтыя гады з замчышча Магілёў ператварыўся ў сучасны індустрыяльны, навуковы і культурны цэнтр, — адзначыў кіраўнік дзяржавы. — Сёння прадукцыя магілёўскіх прадпрыемстваў машынабудаўнічай, хімічнай, дрэваапрацоўчай галін, тавары народнага спажывання вядомыя не толькі ў Рэспубліцы Беларусь, але і ў краінах СНД. Вынік вашай плённай працы — гэта новыя мікрараёны, вытворчыя карпусы, установы аховы здароўя і адукацыі».
Шматграннае культурнае жыццё, адзначанае такімі яркімі мерапрыемствамі, як музычны фестываль «Залаты шлягер», фестываль духоўнай музыкі «Магутны Божа».
«Любоў да сваёй малой ра-дзімы, праява шчырага клопату пра яе, памяць пра гераічнае мінулае, працавітасць, цярпенне і гасціннасць — вось што адрознівае цяперашняе пакаленне жыхароў горада», — падкрэсліў Аляксандр Лукашэнка.
Ён выказаў упэўненасць, што жыхары Магілёва і надалей будуць рабіць усё магчымае для захавання і памнажэння матэрыяльнай і духоўнай спадчыны. Прэзідэнт пажадаў ім моцнага здароўя, шчасця і дабрабыту, стабільнасці, новых здзяйсненняў і добрых пачынанняў у працы ў імя росквіту Рэспублікі Беларусь.
У мінулую суботу наш абласны цэнтр ператварыўся ў месца масавых гулянняў. У свяце прынялі ўдзел не толькі магілёўцы, але больш за 40 дэлегацый з 12 краін свету. У Магілёва 18 гарадоў-пабрацімаў, яшчэ з 18-ццю падпісаны пагадненні аб супрацоўніцтве, з 7-ю, дзякуючы падпісаным пратаколам аб намерах, рэалізуюцца сумесныя мерапрыемствы.
Самым маштабным святочным мерапрыемствам стала паўтарыгадзіннае тэатралізаванае шэсце, у якім прынялі ўдзел каля тысячы чалавек. Гледачам, якія сабраліся ўздоўж галоўнай вуліцы абласнога цэнтра — Першамайскай, прадэманстравалі ўсе этапы развіцця сталіцы Прыдняпроўскага краю, пачынаючы з 1267 года. Вакол архітэктурнага сімвалу Магілёва — Ратушы — праходзілі мужныя рыцары, дэфілявалі сярэднявечная дамы, шпацыраваў імператар Мікалай II з сям’ёй, грукаталі снарады Вялікай Айчыннай вайны, упэўнена ішлі рабочыя аднаўляць горад з руін і дзеці як сімвал шчаслівай сучаснасці і будучыні.
Яркія фарбы, якія адлюстроўвалі творчыя здольнасці жыхароў горада, прадэманстравалі ўдзельнікі конкурсу незвычайных калясак і арт-парасонаў.
Пераможцы спаборніцтваў рознага ўзроўню паказалі гледачам, колькі узнагарод заваявана за апошнія некалькі гадоў. Прадстаўнікі працоўных калектываў найбуйнейшых мясцовых заводаў і арганізацый прадэманстравалі выпускаемую прадукцыю і паказалі, што дамагаюцца поспеху не толькі ў працоўнай дзейнасці, але і самадзейнасці. Вялікі блок у тэатралізаваным шэсці быў прысвечаны гарадам-пабрацімам ​​і партнёрам, нацыянальным дыяспарам і іх традыцыям, у тым ліку танцавальным і музычным.
Падчас шэсця ў неба над Магілёвам ўдзельнікі запусцілі сотні шароў і ўпрыгожылі галоўную вуліцу золатам і срэбрам шматлікіх хлапушак.
Пешаходная вуліца Ленінская ператварылася ў вялікі кірмаш і канцэртную пляцоўку. Акрамя вернісажа дзіцячых малюнкаў і фотаздымкаў ўдзельнікаў конкурса «Магілёў вачамі маладых», жыхароў і гасцей горада цешылі нацыянальныя падворкі. Азербайджанская, украінская, беларуская, армянская, габрэйская, руская, грузінская, польская кухні частавалі традыцыйнымі стравамі. У лічаныя гадзіны сышлі 100 кілаграмаў плову, прыгатаваныя кухарамі кафэ «Чайхана» па таджыкскіх рэцэптах. Зачароўвалі песні, якія выконваліся на розных мовах, нацыянальныя касцюмы і танцы.
Конкурс ухі і рыбных страў, наведванне лазні, спаборніцтвы па рыбнай лоўлі, актыўны адпачынак і шматгадзінную музычную праграму падрыхтавалі арганізатары арт-пляцоўкі «Вялікая бард-рыбалка ў Магілёве», якая разгарнулася на гарадскім пляжы каля ракі Днепр.
У святкаванні юбілейнай даты было задзейнічана больш за 30 пляцовак. Надзвычайную асалоду удзельнікам свята прынесла галоўнае юбілейнае прадстаўленне «Віват — Магілёву 750!», якое адбылося на Плошчы Леніна. Месца было выбрана невыпадкова — тут месціцца найбольшая колькасць гледачоў, а Дом Саветаў з’яўляецца самым прыдатным аб’ектам для праекцыйнага 3D-адлюстраванне шоў (светлавое шоў з праекцыяй на будынак) пра гісторыю абласнога цэнтра з 1267 па 2017 г.г.
Апоўначы з 1 на 2 ліпеня неба над Магілёвам ўпрыгожыў 30-хвілінны феерверк — падарунак кітайскай правінцыі Хунань да 750-годдзя горада. Гэта не адзіны сюрпрыз гасцей з усходняй краіны. Прадстаўнікі правінцыі падаравалі абласному цэнтру два электробусы і восем зборных дамоў. Атрымаў горад і іншыя падарункі. У прыватнасці, «Беларусбанк» набыў для ўстаноў аховы здароўя Магілёва рэанімацыйны аўтамабіль з самым сучасным абсталяваннем. Управа раёна Сакаліная гара горада Масквы ўсталявала каля ліцэя Беларуска-Расійскага ўніверсітэта бронзавую скульптуру «Поціск рукі», а ЖРЭУ Ленінскага раёна — вялізнага льва побач з гатэлям «Магілёў».

Уладзімір Капуза